Aurten Zurriola Ikastola, Eskoletako Urmael Sarearen (EUS) ekimenaren partaide berria bilakatuko da. Aranzadi Zientzia Elkartea eta Donostiako Udalaren laguntzarekin, Ulian, Arbola pasealeku amaieran dagoen Loitxikibehe urmaela egokitzeko ardura egokitu zaigu.
Fisikoki txikiak baina biologikoki oso aberatsak diren urmael sarea egokitzen dabiltza Donostian, eta urmael horietatik bost Ulian egokitu dira. Uliako Loitxikibehe urmaela hondatu dela aintzat hartuz, Zurriola Ikastolak eta Aranzadi Zientzia Elkarteak aukera baliatu nahi izan dute, urmaela auzolanean egokitzeko. Gerora EUS egitasmoaren bitartez bertako fauna eta flora aztertzeko aukera izango dute, Zurriola Ikastolako ikasleek, baina horretarako lehen urratsa urmaelaren egokitzapena izango da.
Gauzak honela, azaroaren 17an auzolanean aritzeko gonbitea luzatzen dizuegu. Aranzadi eta Neikerreko adituekin batera urmaela txukunduko dugu eta hortik aurrera ikasleek, eskolatik gertu laborategi natural bat erabili ahal izango dute, besteak beste ikerlari bilakatuz.
Auzolanean parte hartzeko bete ezazu ondorengo galdetegia.
