Noticias

Azken bi aste hauetan, DBH 4ko ikasleok ISEI-IVEIk antolaturiko Ebaluazio Diagnostikoan parte hartu dugu. Bi goiz pasa ditugu Ikastetxeak eta Euskal Hezkuntza Sistema hobetzeko balio duen proba hau egiten.

Asteartean, “Deskonektatuak” mikroantzerkiaz gozatu genuen DBH 1eko geletan, Arimaz elkartearen eskutik. Teknologia berrien gaia modu ezberdin eta berezian landu genuen: zuzeneko mikroantzerki bat ikusi, eta ondoren aktoreekin solasaldia egin genuen. Beti da interesgarria halako hausnarketak egitea!

Aste honetan, LH6ko ikasleok Eko Oiz elkartearen bisita jaso dugu. Haien proiektua azaltzeaz gain, jasangarritasunaren gainean hitz egiten aritu gara, eta makina sinpleen bidez energia sortu daitekeela ikasi dugu. Primerakoa izan da!

Hainbat guraso eta langile elkartu ginen asteartean “Familiak eta euskara” lanketaren inguruko solasaldia egiteko. Hainbat kezka eta helburu zerrendatu genituen Paula Casaresen hitzaldian oinarriturik, eta Hizkuntza Proiektuaren plan estrategikoan txertatuko ditugu. Hurrengo asteazkenean, apirilak 22, Kike Amonarrizen hitzaldia izango dugu. Hemen duzue hitzaldirako esteka, baina guztiok batera ikusteko deia egiten dizuegu, 18:30ean Ategorrietako 4. solairuan. Zatozte!!

Hilabete falta da Ikastolaren Egunerako! Izan ere, aurten, maiatzaren 16an ospatuko dugu, larunbata, beraz gorde guztiok data zuen egutegietan!! Datozen asteotan emango dizuegu egitarauaren berri, eta bazkarirako txartelak erosteko aukera ere laster zabalduko dugu!

Zurriola Musika eta Dantza Eskolak plaza dantzen ikastaroa antolatu du maiatzaren 6tik ekainaren 3ra bitartean. Asteazkenetan izango da, Ategorrietan, 17:45etik 18:45era. 5 saio izango dira (maiatzak 6, 13, 20, 27 eta ekainak 3), eta 26€-ko kostua izango du. Sei kideko taldea behar dugu ikastaroa osatu ahal izateko, beraz, animatu eta eman izena!!

Ategorrietako atarian aurreko hiruhilekoan zehar ikasleek utzitako txamarra, jertse, aterki eta antzekoak pilatzen joan zaizkigu. Hurrengo astearte eta asteazkenean, apirilaren 21 eta 22an, arratsaldeko 16:30ean Ategorrietako atarian erakusgai jarriko ditugu, eta, zuen seme-alabenak direnak jasotzea eskatzen dizuegu. Jasotzen ez direnak Ikastolako familia zaurgarrienei eskaini eta gero gobernuz kanpoko erakunde batera bideratuko dira behar duten haurrek erabil ditzaten.