Noticias

Aurten ere, Hendaiako Ikastolak Txokolatezko Egutegien proiektua jarri du martxan, eta berriro ere Ikastolen arteko elkartasuna adieraziz eta iparraldeko Ikastolei bultzada emateko asmoz, Ikastolan bertan eskatu eta jaso ahal izango dituzue egutegiak, 12 euroren truke. Gaur bertan edota astelehenean jasoko dute ikasleek eskaera-orria. Zirkularra.

EBETEko Iñaki Eizmendiren eskutik zuzeneko online saioa eskainiko da azaroaren 17an, arratsaldeko 18:00etatik 19:00etara. Euskaraz izango da, euskal profila duten gurasoei zuzendua. Gaztelaniaz eta bestelako hizkuntza-profila dutenei zuzendutakoa saioa abenduaren 15ean izango da. Hona hemen gonbite-txartela!

DBH 1eko ikasleok heziketa afektibo-sexualeko saioak izan ditugu aste honetan, Loveo Loveo elkarteko adituen eskutik. Saio horietan, gure gorputzez, pertsonen arteko harremanez eta sexualitateaz aritu gara.

BTTko irteera eduki genuen asteazkenean GKAIko ikasleok, eta Plazaolako bide berdearen zati bat egin genuen. Andoaindik Leitzara joan-etorria egin genuen, eta primerako eguna pasa genuen.

Atzo, Olarrizuko kideak elkartu ginen, abuztua arteko kontuak eta egindako kudeaketa onartzeko, baita 2026-2027 ikasturterako guraso-batzordeek prestatutako ekimen proposamenak partekatzeko ere. Bereziki aipagarria da hainbat gurasok Ikastolan duzuen parte-hartze aktiboa euskara, danborradak, jaiak eta teknologien erabileraren inguruko ekimenetan.

Bigarren Hezkuntzako Batzordea martxan da aurten ere. Aste honetan egin dugu aurtengo lehen bilera, Ikastola guztion artean eraikitzeko aukera bikaina baliatuz. DBH eta Batxilergoko geletako ordezkariak eta irakasleon ordezkariak elkartu, eta geletan jasotako kezka eta proposamenez aritu gara.

Ikastolen estrategia digital berria aurkeztu zuen Ikastolen Elkarteak astelehenean. Marko teknopedagogikoa garatu dugu ikastolok, eta teknologia eta digitalizazioa ulertzeko eta lantzeko dugun estrategia jasotzen da bertan. Horrez gain, burujabetza teknologikoa ere jarri dugu helburu. Albiste honetan duzue informazio gehiago.

Gelan landutako geologia edukiak zuzenean ikusteko aukera izan genuen DBH 4ko ikasleok Zumaian, eta marea biziak direla aprobetxatuta, marearteko biodibertsitatearen ezaugarri bereziak landu eta bizidunak bilatuz aritu gara.