Noticias

Asteartean, Eskola bideak egitasmoaren baitan, LH4ko ikasleok ikastolara lagunekin oinez etortzeko bide ezberdinak ezagutu ditugu. Horrez gain, bide horietan dauden eta gu laguntzeko prest dauden komertzio ezberdinak bisitatu ditugu.

Gaur LH5eko ikasleak Okendo kultur etxean izan gara. Bertan Juantxu Abasolo artistak Artikutzako basoko zuhaitz batzuei ateratako argazkiak ikusi eta artista berak proposatutako jolas-lehiaketa batean parte hartu dugu. Norberaren irudimenak iradokita, argazkietako zuhaitzei animali-izaki ezberdinen tankera hartu diegu eta horiek idatzi ditugu.

Aste honetan GKAIkoak Ondarreta hondartzan izan gara gure ikasle ohi eta bertako sorosle diren Gorka eta Oierren azalpenak entzuten. Bide batez, uhartera igerian joan ginen (aurten denak iritsi ere!)

DBH 1 eta 3ko ikasleok bi eguneko irteera egin dugu aste honetan, Hondarribia, Orio eta Zarautzera. Taldekatze berriak izan ditugu aurten, eta ikasle berri ugari ere bagara kurtsoan, beraz aukera paregabea izan da elkarren artean ezagutu eta talde-giroa sortzeko. Ikasturtea hasteko modu ezin hobea izan da!!

DBH 2, 4 eta Batxilergoko ikasleok egun pasa joan ginen asteazkenean, Donostiako eta inguruetako txoko ezberdinetara. Aurretik dugun ikasturte honen aurrean gure arteko harremanak indartzeko balio izan zigun irteerak. A zer nolako zortea ikasturte berri honi gogotsu ekiteko!

Ari gara pixkanaka aplikazio berria martxan jartzen eta nahi edo behar dugun erabilera lortu arte, baliteke akats batzuk suertatzea. Lehen aste hauek egokitzapen garaia dira familia eta langileentzat eta lanean diardugu ahalik eta azkarren izan dadin. Bestalde, aplikazioa bera euskaraz jartzeko aukera dagoela gogorarazi nahi dizuegu.

Guraso bilera orokorretan aipatu edo aipatuko zaizuen bezala, hemendik aurrera, Telegram taldeetan bilduko gara geletako gurasoak. Aldaketa honen arrazoi nagusiak hauek dira: aplikazioa euskaraz ere badagoela eta, batez ere, mezuak euskaratik beste hizkuntza batzuetara itzultzeko aukera ematen duela. Aldaketa honekin, gurasoen gehiengoak euskara hutsean idatzi ahal izango ditu mezuak, bi hizkuntzatan aritu beharrik gabe.

Aurten ere Zurriolako Lanbide Heziketakook Zuhatzan eman diogu hasiera ikasturteari, eguraldi eta giro ezin hobearekin!