Albisteak

Batxilergo 1eko Biologia, Geologia eta Ingurumen Zientziak ikasgaiako ikasleok turismo geologikoa egin dugu gaur goizean Donostian zehar. Pasealeku Berriko estratoak, Loretopeko K/T muga eta Urgulleko tonboloak lehen eta orain nolakoak ziren ikasi dugu Luberri Geologia Museoko Maialenen eskutik.

Hurrengo asteartean gutxieneko soldata hemen erabakitzearen aldeko egun osoko greba orokorra deitu dute sindikatuek. Gaur gaurkoz jaso dugun informazioaren arabera, Ikastolako langilegoaren gehiengoak deialdiarekin bat egingo duela aurreikusten dugu, eta, ondorioz, gutxieneko zerbitzuak soilik eskaini ahal izango ditugula.

Igeriketa-ikastaroari amaiera eman diogu gaur LH 3ko Akerbeltz gelako lagunok, eta aurtengoz amaitu da GKAIko ikasleen eskutik urte osoan zehar martxan egon den proiektua! Intxaurrondoko igerilekura joan gara ostiraletan gelaka, azarotik martxora, igeriketa-ikastaroa egitera. Eskerrik asko irakasle lanetan aritu zareten ikasle paregabeei!

Astelehenan, Donostiako Antzoki Zaharrean izan ginen LH 1, 2 eta 3ko ikasleok euskarazko zinemaz gozatzen, eta “Robotia” filma ikusteko aukera izan genuen, Tinko euskara elkartearen eskutik. Primerako goiza pasa genuen!

Donostiako Udalak beste urrats bat egin du Sorleku parkeko obrak udaberrian hasteko. Parkea eraikitzeko lanak adjudikatu ditu aste honetan Udalak, eta badirudi urte bukaerarako prest egongo dela parkea. Auzotarrekin egindako prozesu parte-hartzaile baten bidez jarri zen martxan prozesua, eta gure Ikastolako haurrek parte hartu zuten bertan.

Ikastolako ikasle ohia da Itxaso Martin, eta helduentzako bi eleberri idatzi eta gero, haur literaturan bidea abiatu du MATIren abenturak jasoko dituen bildumako lehen liburuarekin. Atzo LH 4ko geletan izan genuen bisitan, eta liburua aurkeztu zigun! Eskerrik asko, Itxaso!!

Ostegun honetan bizikleta-irteera izan dugu LH 5eko lagunok. Arrobitxulo parketik pasa eta Trintxerperaino iritsi ginen, eta ikasturte honetako irteera berezienetakoa izan da. Bidean GKAI-ko ikasleek jolas ugari erakutsi zizkiguten eta “Pumptruck”-ean ere bira batzuk eman genituen. Nekatuta baina pozik iritsi ginen Ategorrietara.

LH 2ko ikasleok komunikabideak lantzen hasi gara. Hori dela eta, asteazkenean TtanTtakun Donostiako irrati libre eta euskalduna bertatik bertara ezagutzera joan ginen. Bertan, irratirako 6 "kuña" grabatu genituen (igande honetan entzungai egongo direnak 14:00etatik 14:30ak bitarte 107.2 frekuentzian edo ttanttakun.eus webgunean), eta "Hirutxuloko Hitza" astekaria non ekoizten den ere ikusi genuen.