Albisteak

Udan ere euskararekin eta euskaraz gozatzen jarraitu ahal izateko hainbat gida jarri nahi ditugu zuen eskura: Ikastolen Elkarteak sorturiko Arituz bilduma (musika, ipuinak, bideoak zein jolasak), Donostia Kulturako Udal Liburutegien Sarearen gomendio-gida, Elkar argitaletxearen gazte literaturako gomendioak. Azkenik, hemen dituzue DBH 2ko Ikasleen Euskara Batzordearen gomendioak ere. Partekatu eta gozatu euskaraz!

Euskal Herriko 115 ikastoletako lehendakariek agerraldia egin zuten atzo Hernanin, eta azken boladan ikastolen inguruan izandako auzien balorazioa egin eta emandako erantzuna goratu zuten. Argi adierazi zuten ez dugula irudikatzen ikastolen ekarpenik gabeko Euskal Herririk. Irakur ezazue hemen albiste osoa.

Mater ontzi-museoarekin aste osoko proiektua landu ondoren, Plastikoaren Erakusketa Mundiala egin dugu gaur DBH 1eko ikasleok. Etorri diren bisitari guztien artean kontzientzia pizten saiatu gara gure artelanen bidez. Gure esku baitago Lur planeta!

LHko etapa amaituko dugu hurrengo astean LH 6ko lagunok, eta gaur Hurrako eraikina ezagutzera joan gara, irailean nora joan jakiteko! Ziur orain artekoak bezain etapa polita biziko dugula, eta udako obren ondoren eraikina polit-polit izango dugu zain!

Bihar egingo da Iruñean euskaltzaleok antolatzeko eta euskaraz bizitzeko behar den dena aldarrikatzeko mobilizazio erraldoia, Euskalgintzaren Kontseiluak antolaturik. Goazen guztiok euskararen aldeko aldarria egitera!

Aste honetan jarduera osagarriei leku berezia egin diegu DBHn. Bizikleten mantenu-tailerrak, sokasaltoa euskaraz, dantza tailerrak, padel txapelketa, piragua-ikastaroak, sorospen-ikastaroa, trafiko-istripuen prebentziorako lanketa, Euskara Batzordekoek antolaturiko jolasak… Denetik egin dugu! Hurrengo astean gehiago!

Batxilergo 2ko ikasleak agurtu genituen aurreko ostiralean guraso, ikasle eta irakasleak bildu zituen ekitaldian. Penaz eta hunkituta, baina harrotasunez esan genien agur. Gainera, USAPeko ohiko deialdira aurkeztu diren ikasle guztiek gainditu dutela jakin genuen atzo! Zorionak! Hoberena opa dizuegu hemendik aurrerako ibilbidean!

Euskal Herriko Pediatria Elkarteak argi esan du: gailu digitalen gehiegizko erabilerak ondorio larriak izan ditzake haur eta gazteen osasun fisikoan zein psikologikoan eta garapenean. Gero eta argiago ari dira ikusten ondorio horiek kontsultetan, eta ebidentzia zientifikoek ere hori berresten dute. Ekainaren 3an egindako jardunaldian azaldu zuten guztia, eta agiria ere plazaratu zuten.