Albisteak

Datorren asteazkenerako greba orokorraren deialdia egin dute sindikatu eta gizarte eragileek pobretzearen eta errentismoaren kontra. Ikastolan egin zen asanbladan 50 bat lagunek hartu zuten parte eta bertaratutakoek aho batez egin zuten bat grebarekin. Gaur-gaurkoz dugun informazioaren arabera, Ikastolako langileen %80 inguruk deialdiarekin bat egingo du. Hori horrela izanik, gutxieneko zerbitzuak besterik ezin izango ditugu eskaini, ez da zerbitzu osagarririk egongo, eta eskola saioak mugatuak egongo dira.

Dislexia, TDAH, TEL/TDL, TEA, Adimen Gaitasun Handiak edo era konbinatuak dauzkaten haurren eta haien gurasoen egunerokotasuna erraza izaten ez delako, elkarri laguntzeko batu gara. Jakintzak eta esperientziak partekatzeko eta, betiere, espezialistekin eta irakasleekin elkarlanean aritzeko helburua dugu. Zuen burua hor ikusten baduzue, jarri gurekin harremanetan gurasoneuroanitzak@zurriolaikastola.eus helbidean. Elkarrekin arraunean oso urrutira iritsi gaitezke.

Zurriola Ikastola Kooperatiba Elkarteko kide zaren aldetik Ikastolaren erabaki estrategikoetan parte hartzeako aukera duzu. Artezkaritza Kontseilua edo Eskola Kontseiluaren bitartez, arlo ekonomikoetan edo pedagogikoetan eragina izango duten erabakietan zuen hitza ezinbestekoa da. Konpromisoa, inplikazioa eta jarrera arduratsua besterik ez dira behar. Animatu zaitez eta izena-eman!

Berrikuntza pedagogikorako prozesuan murgilduta gaude, eta aste honetan abiatu dugu gurasoekin egiten ari garen parte-hartze prozesua. 40 guraso inguru elkartu ginen asteazkenean Berrikuntza Taldearekin, eta DBHn berrikuntza zergatik eta zertarako behar dugun landu genuen. Azaroaren 17an egingo dugu bigarren saioa, 17:00etan, eta nolako Ikastolarekin egiten dugun amets izango dugu langai.

Datorren astelehenean Inikako aplikazioa euskaraz jarriko da automatikoki erabiltzaile guztientzat. Aplikazioak berak erabiltzen duen hizkuntza aldatu nahiko bazenute, mugikorreko apliklazioko “menua” aukeratik hizkuntza aldatu beharko duzue.

EHIk jardunaldi Pedagogikoak antolatu ditu azaroaren 18rako. Euskalduntzen duen Hezkuntza: erronkak eta estrategiak landuko dira bertan. Ikastolako arduradunak bertan izango dira, baina deialdia zabala da, nahi duenak eman dezake izena.

Ingurunea-ko proiektuaren harira, gaur Alde Zaharreko azokan izan gara. Bertako baserritarrei galdera batzuk egin dizkiegu eta gauza asko ikasi ditugu: garaian garaiko produktuak jatearen garrantzia, gure inguruko baserrietatik zuzenean ekarritako produktuak erosteko dugun aukera… Oso gustura ibili gara postu ezberdinak bisitatzen!

Zurriola Kirol Elkarteko kideok Ikusle Onaren Dekalogoa sortu dugu, gurasoen eta ikusleen portaera egokia sustatuz, kirol-ingurune positiboa, hezitzailea eta errespetuzkoa bultzatzeko helburuarekin. Eskola kirolean balioak ere ikasten dituzte haurrek: errespetua, ahalegina, lankidetza, kiroltasuna eta elkarbizitza. Horregatik, helduen jarrerak berebiziko garrantzia du, haurrentzat erreferente eta eredu baikara.