Noticias

Unibertsoa gaiarekin lotuta, LH 3ko lagunok eureka zientzia museoan izan ginen asteartean egun pasa! Bitxikeria pila ikusi eta esperimentatu genituen zientziarekin lotuta, eta ikasitakoa sakontzeko aukera izan genuen planetariumean. Zenbat ikas daitekeen gure hirian!

Aste honetan, DBH 2ko ikasle batzuk bisitan etorri zaizkigu arratsaldez Ategorrietara, eta LHko ikasleei laguntzen aritu dira. Eskerrik asko zuen laguntzagatik eta halako bisita politengatik!

Otsailaren 15ean egingo dugu Artea Familian tailerraren hurrengo saioa, HHko haur eta gurasoentzat, 11:00etatik 13:00etara bitartean. Hemen dituzue ekimen honen informazio guztia eta izen-ematea.

Donostiako Harrera Sareak kaleko egoeran daudenei hainbat alderditan laguntzen die eta garai honetan mantak biltzen dituzte, kaleko hotzari aurre egiteko. Hortaz, etxean mantak soberan badituzue, otsailaren 14ra arte Ikastolara ekarrita (tutoreari eman) zuen ekarpena egiteko aukera izango duzue.

Saharako errefuxiatu kanpamenduetarako janari-bilketa egin dugu azken bi aste hauetan, eta eta gaur eskerrak eman nahi dizkizuegu Ikastolako familia guztiei! Izugarria izan da bildu dugun janari guztia, eta zuei esker izan da!

Hezkuntza Sailak Zarautzko Salbatore Mitxelena ikastola zigortzeko prozedura jarri du martxan, 140.000 euroko isuna tarteko. Azken urteetan Hezkuntzak Sailak matrikulazio-prozesuan aplikatutako aldaketen ondorioz, ez dira Ikastola gutxi kaltetuak izan direnak/garenak. Hori dela eta, Zarauzko ikastolaren eta ikastola guztien aldeko elkarretaratzea egin dugu gaur irakasleok, eta astelehenean familia guztiekin egingo dugu, 17:00etan Soroa pareko parkean.

Agur esan diegu danbor eta kupel hotsei, baina aurreko ostiralean Ikastolan egin genuen ospakizuneko irudiak partekatu nahi ditugu zuekin. Hemen dituzue Hurrako danborradako argazkiak eta Soroako ospakizunaren bideoa.

Bagera Donostiako Euskaltzaleen Elkarteak euskara saio ireki eta doakoak eskaintzen ditu astero, Donostiara iritsi berri direnentzat edota euskaratik urrun bizi direnentzat. Hortaz, egoera honetan dagoen inor ezagutzen baduzue, anima ezazue dinamika erraz eta jolasen bitartez euskara ikastera!