Albisteak

Zentzumenak lantzen hasi gara LH 3ko lagunok, eta astearte goizean San Telmo museoan izan ginen, gai horixe lantzen. Tailer interesgarri bat egin genuen, eta aukera izan genuen koloreekin jolastu eta koadroetan ikasitakoa praktikan jartzeko!

LH6-ko lagunak Zumaiara joan ginen asteartean, eta bertako Flysch-a bisitatu genuen. Han ikusi eta entzundakoarekin gure planetaren bilakaera hobeto ulertu genuen. Primerako eguna izan zen!

DBH 3ko ikasleok Cristina Enea Fundazioaren Haziberria proiektuan parte hartuko dugu aurten ere, bertako espezieen biziraupena bermatu eta ingurumenaren ezagutzan sakontzeko. Ametzagaina parkean haziak bildu eta Putzuetako mintegian erein ditugu aste honetan. Neguan landaketak egiten ikasiko dugu, eta udaberriarekin batera ereindako haziak nola dauden ikusiko dugu.

Lehenengo Batxilergoko ikasleek antolatutako Hiritarron Harrera Sareari laguntzeko kanpaina abian da! Animatu mantak, arropa, lo-zakuak, estera iragazgaitzak edota zapatilak ekartzera, kale egoeran dauden pertsonei laguntzeko. Horiek ekartzeko epea azaroaren 14ra arte izango da, eta materiala tutoreari eman beharko zaio. Zuen laguntza asko eskertuko genuke!!

Aurten ere, Zuberoako Ikastolak laguntzeko aukera izango dugu bertako gurasoek ekoitzitako produktuekin egindako Gabonetako saskiak erosiz. Ikastolen arteko elkartasuna adieraziz eta Iparraldeko ikastolei bultzada emateko asmoz, aurten ere Zurriola Ikastola produktu hauek jasotzeko gunea izango da.

HH 4 eta HH 5-ekoak hasi gara Baso Eskolako saioekin. Hasiera bikaina izan dugu, eguraldia eta paisaiaz gozatzeko aukera ederrarekin gainera. Zein ederra den natura interpretatuz eta ezagutuz ikastea!

Abenduaren 24an ospatuko dugun “Olentzero eta Mari Domingirekin Kantujiran” kalejiraren prestaketetan gabiltza, eta aurten Ikastolako gurasoak ere gurekin batera ikusi nahi genituzke, musika giroa are politagoa egiteko. Horretarako, galdetegi labur bat prestatu dugu: musika-tresnaren bat jotzen baduzu, mesedez, bete galdetegia azaroaren 11 bitarte.

Ategorrieta-Intxaurrondo arteko sorleku parkea errealitate bihurtzeko aurrerapausua eman du Donostiako Udalak. Auzoarentzat balio handikoa izango da, baita gure HH eta LHko ikasleentzat ere, espazio irekiaren erabilera areagotu ahal izango dugulako. Badirudi iazko mobilizazioek bere fruituak ekarri dituztela, eta 2026an hasiko direla parkea eraikitzen!