Albisteak

Astelehenan, Donostiako Antzoki Zaharrean izan ginen LH 1, 2 eta 3ko ikasleok euskarazko zinemaz gozatzen, eta “Robotia” filma ikusteko aukera izan genuen, Tinko euskara elkartearen eskutik. Primerako goiza pasa genuen!

Donostiako Udalak beste urrats bat egin du Sorleku parkeko obrak udaberrian hasteko. Parkea eraikitzeko lanak adjudikatu ditu aste honetan Udalak, eta badirudi urte bukaerarako prest egongo dela parkea. Auzotarrekin egindako prozesu parte-hartzaile baten bidez jarri zen martxan prozesua, eta gure Ikastolako haurrek parte hartu zuten bertan.

Ikastolako ikasle ohia da Itxaso Martin, eta helduentzako bi eleberri idatzi eta gero, haur literaturan bidea abiatu du MATIren abenturak jasoko dituen bildumako lehen liburuarekin. Atzo LH 4ko geletan izan genuen bisitan, eta liburua aurkeztu zigun! Eskerrik asko, Itxaso!!

Ostegun honetan bizikleta-irteera izan dugu LH 5eko lagunok. Arrobitxulo parketik pasa eta Trintxerperaino iritsi ginen, eta ikasturte honetako irteera berezienetakoa izan da. Bidean GKAI-ko ikasleek jolas ugari erakutsi zizkiguten eta “Pumptruck”-ean ere bira batzuk eman genituen. Nekatuta baina pozik iritsi ginen Ategorrietara.

LH 2ko ikasleok komunikabideak lantzen hasi gara. Hori dela eta, asteazkenean TtanTtakun Donostiako irrati libre eta euskalduna bertatik bertara ezagutzera joan ginen. Bertan, irratirako 6 "kuña" grabatu genituen (igande honetan entzungai egongo direnak 14:00etatik 14:30ak bitarte 107.2 frekuentzian edo ttanttakun.eus webgunean), eta "Hirutxuloko Hitza" astekaria non ekoizten den ere ikusi genuen.

Saharako errefuxiatu kanpamenduetarako janari-bilketan parte hartu genuen urtarrilean, eta larunbat honetan aterako da bildutako janari guztia jasotzen duen karabana, Zurriolatik. Saharako Lagunen Elkartetik eskerrak emateko idatzi digute, eta guztiokin partekatu nahi dugu gutuna, zuei ere eskerrak emateko!!

Emakumeen eguna pasa berri den honetan, betaurreko moreak jantzita begiratu nahi izan diogu teknologia berriak eta sare sozialen gaiari. Neskak erdigunean jarri eta sare sozialek beraiengan izan dezaketen eragina utzi nahi dugu agerian. Infografia honetan duzue informazioa. Babestu ditzagun!!!!

Euskal hiztun naturalak (“Lekukoak”) babestu eta horien artean ez daudenak konzientziatzeko dinamika jarri dugu martxan geletan. Horretarako, mintzagrama bat pasako diegu ikasleei, eta beste ikaskideekin eguneroko komunikazioan gehienetan erabiltzen duten hizkuntza zehaztu beharko dute. Behin “Lekukoak” identifikatutakoan, gainerakoek haiekin euskaraz egiteko konpromisoa hartuko dute.