Azken boladan zabaldu den informazioak kezka piztu du Ategorrietako airearen kalitatearen inguruan. Ekologistak Martxan-ek eta Udalak egindako neurketen arteko desberdintasunetan sartu gabe, nabarmena da Intxaurrondoko sahiesbideak ibilgailu kopurua handitzea ekarri duela, inguruko airearen kaltetan. Zurriola Ikastolako Zuzendaritza taldea eta Mugikortasun Batzordea lanean ari dira Udalarekin, neurri ezberdinak har daitezen.
Albisteak
BATX1
Batxi 1eko ikasle den Josu Arrizabalagak Euspot lehiaketako gazteen lehen saria irabazi du!! Euskarazko sormena bultzatu eta publizitate arloan euskararen erabilera sustatzeko helburua duen lehiaketa da Euspot, eta Ikus Entzunezko Komunikazioa ikasgaian prestatu dute lehiaketarako lana. ZORIONAK JOSU!!!
BATX2
Batxilergo 2ko ikasleak agurtu genituen aurreko ostiralean guraso, ikasle eta irakasleak bildu zituen ekitaldian. Penaz eta hunkituta, baina harrotasunez esan genien agur. Gainera, USAPeko ohiko deialdira aurkeztu diren ikasle guztiek gainditu dutela jakin genuen atzo! Zorionak! Hoberena opa dizuegu hemendik aurrerako ibilbidean!
LH2
Oporrak gerturatzen ari dira eta eguraldi onarekin batera, 2. mailako lagunak Zurriola hondartzan ibili gara goizpasa. Oso ondo pasatu dugu urarekin jolasten eta karramarroak bilatzen!
GKAI
Gizarte eta Kirol Animazioa eta Irakaskuntza zikloko bigarren mailako ikasleek ere aste honetan amaitu dute beren bidea, eta agur-festa antolatu diegu. Bi urte hauetan landu eta ikasitakoa aurrerantzean baliagarri izango zaizuelakoan agurtu gara, eta zorterik onena opa dizuegu zuei ere!
HH2
Aste honetan, HH 2ko aita eta ikasle ohia den Beñat Antxustegi musikaria kontzertu bat eskaintzera etorri zaigu gelara. Gure kanta ezagunak eta bere disko berriko kanta bat abestu dizkigu primizian. Oso ondo pasa dugu, mila esker Beñat!
OROKORRA
Hezkuntza Sailak hurrengo ikasturteko egutegia antolatzeko baldintzak jakinarazi ditu dagoeneko, eta aukera eta proposamenak aztertu ondoren, egutegia onartu dute Ikastolako Zuzendaritza Taldeak eta Eskola Kontseiluak. Hauxe izango dugu, beraz, 25/26 ikasturteko egutegia.
DBH
Ekintza ugariko astea izan dugu hau DBHko ikasleok. Oporretarako gutxi falta dela probestuz, jarduera ugaritan parte hartzeko aukera izan dugu: zirku-ikastaroa, mikro-plastikoen proiektua, paddle-txapelketa, surf- eta piragua-ikastaroak, sokasaltoa euskaraz sustatzeko tailerra, udalaren Lore Mintegietara bisita, ur-sorospenetako ikastaroa, bizikleten-mantenu tailerrak, aniztasun sexualari buruzko saioak, Uliako urmaelen azterketarako irteera, Emakumeak Zientzian tailerra, antzerki emanaldiak… Azken egunak gogotik aprobetxatzen ari gara!