Albisteak

Ategorrietako atarian hiruhilekoan zehar ikasleek utzitako aterki, jertse eta antzekoak pilatzen joan zaizkigu. Beraz, deia egiten dizuegu hurrengo astelehen eta asteartean (martxoak 31 eta apirilak 1), arratsaldeko 16:30ean, Ategorrietako atarian erakusgai jarriko ditugun arropa eta aterkiak begiztatzera, eta, zuen seme-alabenak badira, hauek jasotzera.

Ostegunean LH6ko ikasleak Hernanin izan ginen Gipuzkoako eskolarteko bertso idatzien txapelketan. "Gurasoekin haserretu naiz" gaia emanda, 4 kopla edo 2 bertso egin behar genituen. Harri Arinek bigarren postua erdietsi zuen, zorionak!!!

Bigarren ebaluazioari amaiera emateko, DBHko eta Batxilergo lehenengo mailako ikasleok irteera egin genuen asteazkenean. Euskal Herria sakonago ezagutu ahal izan genuen, Amaiurren, Gasteizen, Iruñean, eta Ezkion, mailaz maila. Eta, noski, testuinguru desberdin batean elkarren artean gozatzeko izan genuen!

Batxilergoko ate irekiak egin genituen lehengo astean, eta Arte Batxilergoaren bisita egiteko erakusketa polit bat antolatu genuen Arte Gelan. Jarraian dituzue ikusgai argazki batzuk, bai eta Arte Batxilergoari buruzko bideo interesgarria ere. Zabaldu ezazue interesa izan dezaketenen artean!

Euskadiko Kooperatiben Konfederazioak (KonfeKop) aitortza egin dio Zurriola Ikastolari, “Emakumearen ikusgarritasuna euskal kooperatibismoan” sustatzeagatik egindako lanagatik. Gure ardatzetako bat da hezkidetza, eta horretan jarraituko dugu, martxoaren 8an eta urteko gainerako egun guztietan!

Martxan da TREBA Gurasoak prestakuntza-ekimenaren 4. edizioa. Gipuzkoako Foru Aldundiak martxan jartzen duen programa honek gurasoak hezkuntza-gaitasunetan trebatuz, haurren eta nerabeen bizi-kalitatea eta aukerak hobetzea du helburu, eta Donostian martxoa eta azaroa bitartean garatuko da (programazioa). Hemen duzue lehen hitzaldia: elikadura jarrera osasuntsuak.

Atzo egin genuen teknologia berrien inguruko gurasoentzako saioa, Orain Prebentzioaren eskutik, eta informazio baliagarri ugari jaso genuen! Gainera, gure esperientzia eta kezkak partekatzeko aukera ere izan genuen. Egoteko aukerarik izan ez zenutenon eskura jarri nahi dugu “Teknologia berriak. Gurasoentzako gomendioak” txostena eta jardunbide egokien dekalogoa.

Badator EUSKARALDIA, eta aurreko edizioetan ez bezala, aurtengoan udaberrian ospatuko da, maiatzaren 15etik 25era. Ekintza desberdinak antolatuko ditugu Ikastolan, noski, baina orain norbanako gisa izena emateko unea da. Esteka honetan duzue izen-ematea, eta AHOBIZI edo BELARRIPREST rola aukeratu beharko duzue. Eman izena, eta gogoratu: gakoa jokaeran dago, ez gaitasunean!