Albisteak

LH6ko ikasleak Gipuzkoako eskolarteko bertso idatzien lehiaketan aritu ginen lehengo astean Hernaniko Biteri aretoan. Bertsoak idazteaz gain, bertso saio batez ere gozatzeko aukera izan genuen. Iraitz Arcelus eta Irati Castejon izan ziren sarituak. Oinak buruan, egun ederra pasa genuen!

Baionako Estitxu Robles Kolegioko lagunekin elkartrukea egin dugu aste honetan DBH 1eko lagunok! Haien etxeetan izan gara aste hasieran, eta astea amaitzeko haiek etorri dira gure etxeetara. Esperientzia ezin hobea izan da, eta lagun onak egin ditugu gainera. Elkartruke hau izan dadila etorkizuneko zubi!!

DBH4ko ikasleok Donostian zehar ibili gara aste honetan, Gerra Zibilak utzitako aztarnak ikusten. Asko ikasi ahal izan dugu historian oso atzera egin gabe, eta horrelako guda batek ekarritako kalte material eta pertsonalak aztertu ahal izan ditugu.

Egun berezia izango dugu hurrengo asteazkena Donostian, baita Ikastolan ere! Egun osoko plangintza berezia izango dugu etapa guztietan, Korrika Donostiatik pasako dela ospatzeko. Zirkular honetan duzue informazio guztia, etapaz etapa.

Ikastolako ekimenez gain, Korrikan parte hartzeko aukera ugari izango ditugu datozen 11 egunetan. Zuen eskura jarri nahi ditugu mapa, egitarau eta kartelak.

Ikastolako gela bakoitzak puntu bat jarri du “Historiako bertsorik luzeena” deitu diogun honetan! Hemen duzue Korrikaren harira Ikastola osoak elkarrekin sortu eta abestu dugun bertso erraldoia!

Iritsi da eguna!! Bihar abiatuko da 24. Korrika, Atharratzetik Bilbora! 11 egunez Euskal Herrian zehar ibiliko da lekukoa eskurik esku, eta martxoaren 29an Bilbora iritsi eta lekukoan joango den mezu ezkutua irakurriko dute! EUSKARA GARA lelopean egingo da euskararen aldeko kontzientzia suspertzea eta euskaltegien eguneroko lana indartzeko dirua biltzea helburu dituen euskararen aldeko ekimen erraldoia!

Asteak daramatzagu Ikastolan Korrikaren beroketa-lanetan. Petoak marrazten aritu gara, Korrikaren ibilbidea jarraitzeko mapak prest ditugu, aurtengo abestia behin eta berriz abestu dugu geletan, Korrikara eramateko kartelak prestatu ditugu, Korrikaren inguruko lehiaketa antolatu dugu… Eta datorren asterako ere ekintza ugari ditugu prest!