Albisteak

Marrutxipiko lotura berriak gure Ikastolaren inguruan izan ditzakeen ondorioek kezka handia sortzen digute, bertan egunero oinez gabiltzanongan izango duen eragina bistakoa baita. Horrexegatik, Udaleko Mugikortasun zinegotziarekin eta zuzendariarekin bilera egingo dugu, ondorio horiek ekiditeko neurriak eskatzeko.

Azpeitiako Ikastolak urriaren 6ko Kilometroak jairako laguntza behar du, eta Ikastola bakoitzetik 30 bat lagun eskatu dizkigute auzolanean aritzeko. Ikastolen proiektua babesten dugun guztiok egun horretaz gozatu ahal izateko laguntza ezinbestekoa dute!

LHko ikasleok Zinemaldian izan gara aste honetan, eta beste ikastetxe batzuekin batera “Alan giza antena” filma ikusi dugu Belodromoan. Asko gozatu dugu Donostiako zinemaldiaz!

Atef Abu Saif idazle eta Palestinako Aginte Nazionaleko Kultura ministro ohia Donostian izango da hurrengo astean, Berria egunkariaren eskutik, Gazako egoeraren inguruan idatzitako liburuaren euskarazko itzulpena aurkezteko.

Teknoizetik, EITBko saio bat ikusteko gonbitea luzatu nahi dizuegu oraingoan. Mugikorrak eta sare sozialak erabiltzeak nerabeengan izan ditzaketen ondorioez hausnartzeko saioa estreinatu zuen ETB2k pasa den astelehenean; “Generación click” izenekoa.

LH1eko ikasleak hasiak gara lanean Ategorrietan, eta gauza ugari ezagutzen ari gara. Irudietan ikusi dezakezuen moduan, martxan jarri ditugu matematika txokoak, eta primeran pasa dugu jolas berriak ezagutzen. Horrez gain, psikomotrizitate saioei ere gogoz ekin diegu. Ikasturte hasiera zoragarria izaten ari da.

Urriaren 6an Azpeitian egingo den Kilometroak festan laguntzeko deia egiten diogu Zurriola Ikastolako komunitate osoari berriro ere. Jende beharrean daude oraindik, garbiketa- eta txosna-lanetarako batez ere, goizeko 10:00-15:00etarako tartean. Eman izena!

Gure seme-alabei smartphoneak ahalik eta beranduen emateko bidea hasi dugu eta pausuz pausu aurrera egingo dugu. Elkarrekin, indarrak batuz, jarraituko dugu lanean. Irakurri jarraian duzuen informazioa eta bete galdetegia.