Jaiz jai gabiltza hiruhileko honetan, eta gaurkoan zuen eskura jarri nahi ditugu Haur Danborradako eta Kaldereroetako argazkiak. Laster izango da inauterien txanda. Segi dezala festak!
Albisteak
HH5
Aste honetan, igelen eta beren bizi-zikloaren inguruan asko ikasi dugu HH 5eko lagunok. Beren bizileku diren urmaelak ez dira putzu zikinak, biodibertsitate handiko tokiak dira eta ezinbetekoak dira naturarentzat. Ondo zaindu behar ditugu. Eskerrik asko aitona Ruben!!
OROKORRA
Oporrak Bakean harrera programa Donostiako 12 harrera-familien bila dabil, 12 haur saharar errefuxiatuk uda gure artean igaro dezaten. Zu izan zaitezke horietako bat, animatuko zara? Hemen duzue informazio-bilerarako deialdia.
LH5
Aste honetan, LH5eko bi gelak iraunkortasun eta eraginkortasun energetikoarekin lotutako saioak egin ditugu ISTA in School-en eskutik. Berotegi-efektuko gasen isurpenean eraikinek duten eginkizunari buruz hausnartu eta etxeetan energia aurrezteko oinarrizko jarraibideak landu ondoren, Ategorrietako hainbat tokitan Ikastolaren energia-kudeaketa ebaluatu dugu.
HH-LH
Iritsi dira Kaldereroak Hungariatik Zurriolara! Goizean HH 2-3ko kaldereroen festa izan dugu Soroan, eta LH 1eko lagunak Domus Vi egoitzan izan gara, bertakoei Hungariako doinu eta dantzak erakusten! Arratsaldean berriz, denok batera Manteon elkartuko gara, inauteria iragartzeko asmoz! Eguraldiak ez digu kalera ateratzen utzi, baina ozen kantatu dugu, auzoak entzuteko moduan!
OROKORRA
Asteartean Ikastolako lagun ugari elkartu ginen, eta Groseko kaleetan zehar aritu ginen kopla kantari, santa eskean. Hementxe bideo txiki bat. Ohitura zaharrak berrituz, tradizioari lekua egin genion!
OROKORRA
Asteazken arratsaldean, Ikastolako hezitzaile guztiok elkartu ginen, Euskal Herriko Ikastolok partekatzen dugun hezkuntza markoaren baitan hezitzaile-ereduaren bereizgarri eta ezaugarriak garatzen jarraitzeko.
LH4
Asteazkenean LH 4. mailakoek Albaola Itsas Kultur faktoriara egin genuen irteera. Bertan XVI.mendeko San Juan baleontziaren istoria ezagutu genuen, 1565ean Euskal Herritik Ternuara joaten ari zela Red Bay-n hondoratu zena. Honetaz gain, Zilarreko Itsasargira gerturatu ginen eta ondoren San Pedroko frontoian bazkaldu eta jolastu genuen. Egun borobila!