Albisteak

Aste honetan, LH5eko bi gelak iraunkortasun eta eraginkortasun energetikoarekin lotutako saioak egin ditugu ISTA in School-en eskutik. Berotegi-efektuko gasen isurpenean eraikinek duten eginkizunari buruz hausnartu eta etxeetan energia aurrezteko oinarrizko jarraibideak landu ondoren, Ategorrietako hainbat tokitan Ikastolaren energia-kudeaketa ebaluatu dugu.

Iritsi dira Kaldereroak Hungariatik Zurriolara! Goizean HH 2-3ko kaldereroen festa izan dugu Soroan, eta LH 1eko lagunak Domus Vi egoitzan izan gara, bertakoei Hungariako doinu eta dantzak erakusten! Arratsaldean berriz, denok batera Manteon elkartuko gara, inauteria iragartzeko asmoz! Eguraldiak ez digu kalera ateratzen utzi, baina ozen kantatu dugu, auzoak entzuteko moduan!

Asteartean Ikastolako lagun ugari elkartu ginen, eta Groseko kaleetan zehar aritu ginen kopla kantari, santa eskean. Hementxe bideo txiki bat. Ohitura zaharrak berrituz, tradizioari lekua egin genion!

Asteazken arratsaldean, Ikastolako hezitzaile guztiok elkartu ginen, Euskal Herriko Ikastolok partekatzen dugun hezkuntza markoaren baitan hezitzaile-ereduaren bereizgarri eta ezaugarriak garatzen jarraitzeko.

Asteazkenean LH 4. mailakoek Albaola Itsas Kultur faktoriara egin genuen irteera. Bertan XVI.mendeko San Juan baleontziaren istoria ezagutu genuen, 1565ean Euskal Herritik Ternuara joaten ari zela Red Bay-n hondoratu zena. Honetaz gain, Zilarreko Itsasargira gerturatu ginen eta ondoren San Pedroko frontoian bazkaldu eta jolastu genuen. Egun borobila!

Ategorrietako Aketz etxea (Jubilatuen Etxea) eraitsi nahi du udalak, adinekoentzako 5 apartamentu eraikitzeko. Auzolanean kontserbatu eta bizirik mantendu den ikono bat da, eta etxea mantentzeko eta adinekoentzako apartamentuak beste orube batean eraikitzeko eskaera dago martxan.

Maitatzen zekien herriari “maite zaitut” esaten irakatsi zioten Pirritx, Porrotx eta MariMotots pailazoek. Orain, ereserki bilakatutako abestiak hogei urte beteko dituenean, merezitako “maite zaitut” ozena eskaintzeko herri omenaldi bat antolatu dute euskalgintzako eta herrigintzako hainbat lagunek, eta Ikastolen Elkarteak bat egin du ekimenarekin. Bazatoz??

LH 1eko lagunok giza-gorputza lantzen aritu gara, eta astearte honetan merienda osasuntsu batekin eman diogu gaiari amaiera. Gainera, aste hauetan zehar gutako batzuen gurasoak etorri dira giza gorputzarekin loturiko lanbideez hitz egitera. Ezin borobilagoa izan da gaiaren amaiera!