Ikasturteari hasiera emateko, hiru egun pasa genituen pasa den astean Zuhatzan GKAI Kirol Animazioko eta Irakaskuntzako goi mailako heziketa zikloko ikasleok. Elkar ezagutu eta gure arteko harremanak sendotzeko aukera izugarri polita izan da, eta animazio-ekintzak guk geuk antolatzeko baliatu dugu gainera!

Hemen dituzue, dagoeneko, guraso-bilera guztietako txostenak eta bilera horietan parte hartzeko izen-emate galdetegiak. Kontuan izan bi txosten irakurri behar dituzuela: Txosten Orokorra (maila guztietarako berbera) eta zuen seme/alabaren mailako txostena.

Urtero bezala, gurasoentzako euskara-eskolak eskainiko ditugu aurten ere Ikastolan bertan. Gainera, Ikastolako gurasoek euskaraz mintzatzeko egiten duzuen hautuak ikasleen euskararekiko atxikimenduan duen eragina ezagututa, Ikastolak bere gain hartuko ditu asistentzia-eskakizuna betetzen duten ikasleen matrikula-gastuak.

Ikasturte hasiera honetan ere gogorarazi nahi dizuegu zer garrantzitsua den Ikastola inguruko bideak errespetatu eta gure haurren segurtasuna bermatzea! Ez ahaztu LHko eraikinera eramaten duen Atarizar kalea oinezkoena dela eta ezin ditugula gure autoak sartu. Halaber, Soroa inguruan ere pasabideak errespetatzeko eskatu nahi dizuegu.

Hasi dugu 24/25 ikasturtea!!! Urduritasunez beteriko astea izan da batzuentzat, ilusioz beterikoa besteentzat, eta berriro elkar ikusteak sortzen duen pozarekin ekingo diogu denok ikasturteari!

Lehen astea igaro dugu, eta hurrengo astelehenetik aurrera (irailak 16) goiz eta arratsaldeko jarduna izango dugu HH eta LHn. Hemen dituzue HHko eta LHko antolaketa jasotzen duen zirkularrak.

Goiz eta arratsaldeko jardunarekin batera, datorren astelehenean hasiko da hainbat eskolaz kanpoko jardueraren ikasturtea ere: Musika eta Dantza Eskola, Antzerki Eskola, Bertsolaritza, Eskola Kirola eta Arte Eskola hain zuzen ere. Xakea, Gimnasia Erritimikoa eta Hip Hop-ari dagozkion jarduerak, aldiz, irailaren 23ko astean hasiko dira.

Zurriola Musika Eskolak guraso eta langileentzako pandero-taldea antolatu nahi du aurten ere, gure kulturan hain errotua dugun musika-tresna hau ikasteko aukera eskainiz! Asteartetan elkartuko gara, 19:00etatik 20:00etara, Ategorrietan. Animatu, eta interesa duzuenok idatzi zurriolame@zurriolaikastola.eus helbidera.

Urriaren 6an ospatuko da Azpeitian aurtengo Kilometroak festa, Azpeitiko Ikastolaren eskutik. Ikastolen Elkarteko ikastola guztioi auzolanerako deia egin digute, goizean zehar zeregin desberdinetan laguntzeko. Hortaz, Zurriola Ikastolako kide guztioi dei egiten dizuegu Ikastolon festa honetan parte hartzeaz gain, gure aletxoa jarri eta lanean ere laguntzeko.

Maiatzean ireki zen 24/25 ikasturteko zerbitzuetan izena emateko epea. Izen-emate horietan aldaketarik egin nahi baduzue edota alta berriren bat egin nahi baduzue, galdetegiak irekita izango dituzue irailaren 5era bitartean.