GKAIko Herri Kirolen Txapelketa ospatu genuen asteazkenean Atano III.a pilotalekuan. Sokatira, boloak, txingak, toka, giza-proba eta zaku-karrerak, denetarik izan genuen!! Hemen duzue txapelketaren laburpen-bideoa.

XX. Eduardo Chillida Olinpiada Matematikoan parte hartu dute Ikastolako hainbat ikaslek, eta DBH 2ko Joanes Lopez lehen 12 finalisten artean sailkatu da. Hezkuntza Sailburuaren eta Eduardo Chillidaren senideen eskutik jaso dute gaur saria Joanesek eta matematikako irakasleak, Eusko Jaurlaritzaren Gasteizeko egoitzan egin den sari-banaketan.

Euskal Herriko txoko desberdinetara joan ginen asteazkenean LH 2, 4, 5 eta 6ko lagunok, eta bertan pasa ditugu hiru egun. Ekarrekin konpainiaz eta naturaz gozatzeko aukera izan dugu Arantzan, Lizarran, Allon eta Zuhatzan.

Natura eta Euskal Herriko ekosistemak landu berri ditugu LH 1 eta LH 3ko lagunok, eta atzo egunpasa joan ginen ikasitakoak bertatik bertara ezagutzera.

Igande honetan ospatuko da Ibilaldia, Bizkaiko Ikastolen jaia, Getxon. “Txonbo” lelopean, guztiok parte hartzeko egitarau oparoa prestatu du San Nikolas Ikastolak, eta oraingoan ere girotze-lanetan aritu gara gurean ere.

35. Gazteen antzerki topaketak hasi dira, eta Zurriola Antzerki eskolak bi estreinaldi izango ditu datorren astean: Shakespeare eta Infirnitum. Goza dezagun euskarazko gure antzerkiaz!!

Bihar hitzordu garrantzitsua dugu, Ikastolaren festa ospatuko baitugu. Ez ahaztu bizkotxo eta patata tortila lehiaketetan parte hartzea (ez da izenik eman behar, zuzenean eraman bakarrik). Irrintzi eta alpargata jaurtiketa lehiaketa ere izango ditugu aurten. Sari bikainak izango dira bertan, bingo eta tonbolarako ere bai. Hemen duzue egitaraua. Animatu eta bihar ikusiko dugu elkar!

Seaskako Bernat Etxepare lizeoko ikasleek azterketak euskaraz pasatzearen eskubidea defendatzeko mobilizaziorako deia luzatu dute gaurko, maiatzaren 17rako. Guztien arteko sarea irudikatzeko asmoz, elkarretaratzeak, manifestazioak, bide blokeoak, une zaratatsuak, kalejirak edo dena delakoak antolatzeko deialdia egin dute.

Gure seme-alabek erdaraz aritzeko duten joeraz kezkaturik, Zurriolako Gurasoen Euskara Batzordetik ikastolako guraso guztiak gonbidatu nahi zaituztegu elkarrekin gogoeta egin eta estrategiak pentsatzera. Ebete elkartearen laguntzaz egingo dugu lehen saioa, maiatzaren 30ean arratsaldeko 17.00etan Ategorrietan.

Atzo, maiatzaren 16an, Musika Eskolako irakasleek emanaldi zoragarri bat eskaini ziguten HH3ko haurrei. Abestu eta dantzatu egin genuen, eta kalejiran ederki ibili ginen!