Noticias

Ikastolako hizkuntza paisaia moldatu nahi du Gurasoen Euskara Batzordeak, ikastolako gune guztietan, baita atarian ere, haurrek zein helduok euskaraz egin behar dugula gogorarazteko. Aurrerantzean, beraz, “Hemen ere euskaraz” kartelak ikusiko dituzue hiru eraikinetako atarietan. Euskararen erabileran ere, izan eredu!

DBHko Euskara Batzordeko ikasleok gelaz gela ibili gara Soroa, Ategorrieta eta Hurran, eta euskararen lore bana utzi dugu gela bakoitzean. Loreek bezalaxe, euskarak ura behar du, erabileraren ura. Hortaz, hemendik eta udaberriko oporretara bitartean, euskararekin ureztatuko ditugu loreak geletan, eta apirilaren 11n Txofren bilduko gara udaberria ospatzeko!

Bihar dugu Emakumearen Nazioarteko Eguna, eta berdintasunaren aldarrikapena egin dugu Ikastolan! Gure aldarriekin apaindu dugu Ikastola, eta Hurran eta Soroan dantzan erreibindikatu dugu egunero dela M8!

Azken hilabete honetan, lanbideen gaia landu dugu LH 2ko ikasleok. Lanbide desberdinak ezagutu ahal izateko, hainbat gurasoen bisitak izan ditugu gela guztietan. Mila esker zuen denbora gurekin partekatu duzuen guztioi! Oso polita izan da!!

Zarauzko Salbatore Mitxelena Ikastolari 140.000 eurotako isun ekonomikoa jarri zion urtarrilean Hezkuntza Sailak, ikasleen matrikulazio-araudi berriak ezarritako ikasle topearen gainetik Ikastolako kide izan nahi zuten familia guztien HH2ko haurrak jasotzeagatik.

Eskola Bideak programa martxan jartzeko lanketa egiten ari gara Ikastolako Agenda 30 lantaldea eta Mugikortasun Batzordea, Donostiako Udalaren aholkularitzarekin. Lanketaren helburua LH 4tik LH 6rako ikasleek etxetik Ikastolarako bidea modu seguru eta autonomoan egitea da. Udaberriko oporren ostean ikasleen eskutik emango dizuegu lanketari buruzko informazio zehatzagoa.

Haur eta gazteek teknologia berriekin egiten duten erabilera desegokiak kalte larriak sor ditzake, eta, ikasleek egiten dituzten lanketez gain, gurasook ere horren berri izatea ezinbestekoa da. Arrisku horiek ezagutu eta ekiditeko helburuarekin gurasoentzako saio bat antolatu dugu aurten ere, “Orain Prebentzioa” elkartearen eskutik, martxoaren 20an, 17:00etan.

Ekosistemak ikasten ari garenez, LH5eko ikasleak Plaiaundira joan gara aste honetan. Asteazkenean LH5A eta LH5C-ren txanda izan zen eta ostegunean, berriz, LH5Bkoena. Bertako hegaztiak behatzeko aukera ezin hobea izan genuen: zikoinak, ahateak, antzarak... Zein altxor politak ditugun gure inguruan!